Sendeiro do Ruxidoiro
Ruta circular, que comeza e remata xunto a Igrexa de San Xoán en Vilar de Santos.
1. Ruta circular, que comeza xunto a Igrexa de San Xoán en Vilar de Santos. A igrexa de orixe románica, foi trasladada desde a aldea de Saa.
Na praza do Concello, xunto a mesma igrexa, podemos aparcar o coche e coller auga para o camiño na Fonte de Cachalgura.
2. Deixando atrás a Igrexa iniciamos camiño cun fermoso paseo á sombra de vellos carballos, que nos conducirá ao cemiterio e á aldea de Saa. Antiga capitalidade do concello, que foi abandonada.
3. Saa foi construída sobre rocha. Nas súas rúas aínda poden verse as rodeiras deixadas polos carros na pedra. As pequenas casas agrupadas e das que aínda se intúen as paredes, fálanos doutro tempo.
Na actualidade, Saa está a ser reformada e en proceso de recuperación.
4. Despois de Saa temos unha pequena subida que nos leva á parte baixa do Monte de Saa.
Desde aquí podemos ver una panorámica da chaira.
5. Seguimos o noso camiño aproveitando da frescura do bosque, ata chegar ao muíño abandonado do Ruxidoiro, entre poulas e carballeiras e a auga nos regatos. Un lugar cheo de misterio que encantará aos máis pequenos. Estamos na zona núcleo da Reserva da Biosfera.
6. Comezamos o retorno cara Vilar de Santos, polo camiño que ía cara a Cerredelo. Chegamos novamente a Saa, onde podemos deternos na área recuperada da Fonte do Pazo de orixe romana. Despois seguiremos o camiño entre carballos e sombra que nos levará de volta a Vilar de Santos, onde poderemos descansar no parque de Cachalgura.
